SÍM framleigir vinnustofur til félagsmanna í 9 vinnustofuhúsum víðsvegar um höfuðborgarsvæði.  Vinnustofuhúsin eru á Seljavegi 32, Hólmaslóð 4, Héðinsgötu 1, og á Korpúlfsstöðum í Reykjavík, Auðbrekku 1, 2, 6 og 14 í Kópavogi og Lyngási 7 í Garðabæ, en vinnustofurnar eru hátt í 230 talsins.

Vinnustofurnar eru alla jafna fullnýttar, en félagsmenn geta farið á biðlista og ganga þá fyrir ef vinnustofa losnar. Þeir sem eru á biðlistunum þurfa að fylgjast vel með auglýsingum frá SÍM um vinnustofur og hafa samband ef áhugi er fyrir hendi. SÍM hefur ekki samband við þá sem eru á biðlistunum til þess að bjóða vinnustofur sem losna, heldur verða félagsmenn að fylgjast vel með.

Upplýsingar og úthlutunarreglur vegna vinnustofa SÍM

Þau gæði sem SÍM aflar eiga að deilast út til félagsmanna eftir lýðræðislegum reglum. Þegar um er að ræða gæði sem eru af skornum skammti, eru skipaðar nefndir sem fara yfir umsóknir félagsmanna og afgreiða þær.

Reglur um vinnustofur SÍM eiga að tryggja að allir félagsmenn SÍM sitji við sama borð þegar kemur að því að úthluta þeim takmörkuðu gæðum sem SÍM hefur yfir að ráða.

Samþykktar reglur um vinnustofur SÍM.

​

1. Vinnustofur SÍM eru leigðar út til 3ja ára í senn (og hefur sú regla verið frá upphafi ).

2. Á 3ja ára fresti eru allar vinnustofurnar lausar til umsóknar.  Skipuð er úthlutunarnefnd sem fer yfir umsóknirnar og úthlutar vinnustofunum.

3. Hægt er að sækja um endurnýjun á leigusamningi 2svar sinnum, ekki er hægt að leigja vinnustofu í sama vinnustofuhúsi lengur en þrjú leigutímabil, 3 x 3 ár eða samtals í 9 ár

4. Þeir félagsmenn sem ekki hafa rétt á að sækja um vinnustofu í sama vinnustofuhúsi og áður, geta þó sótt um í öðru vinnustofuhúsi á vegum SÍM.