SÍM

Kæru meðlimir,

​Ég hef setið í stjórn SÍM síðastliðin tvö ár og á þeim tíma öðlast góða innsýn í starfsemi
félagsins og mótað skýra sýn á það sem þarf að efla í rekstri, stefnu og ásýnd þess. Verði ég
kjörin formaður mun ég leggja áherslu á tímabæra endurskoðun á rekstrarformi og hlutverki
SÍM. Rekstur félagsins þarf að vera gagnsær, sjálfbær og byggja á skýrum forsendum sem
styðja við bætt starfsumhverfi myndlistarmanna og aukinn samfélagslegan skilning á
mikilvægi myndlistar.

Ég vil: greina kostnað og ávinning núverandi rekstrarforms, draga úr tvíverknaði og óþarfa
umsýslu, efla gagnsæi og samskipti við félagsmenn, stuðla að samheldni og samstarfi
innan myndlistarsamfélagsins. Formaður SÍM þarf jafnframt að vera öflugur málsvari
félagsmanna og myndlistar í opinberri umræðu. Ég vil vinna að bættum kjörum, sterkari
samningsstöðu og aukinni viðurkenningu á mikilvægi myndlistar í samfélaginu.

Myndlist hefur bæði menningarlegt og samfélagslegt gildi sem nær langt út fyrir
efnahagslega mælikvarða. Mikilvægt er að SÍM sé faglegt, sameinandi og sýnilegt afl í þágu
félagsmanna sinna og samfélagsins alls. Ég tel mig hafa þekkingu, innsýn og hæfni til að
leiða félagið með ábyrgum og uppbyggilegum hætti.

​​​​

Virðingarfyllst,

Anna Rún Tryggvadóttir

Ég er starfandi myndlistarmaður með SÍM vinnustofu á Korpúlfsstöðum. Mínar áherslur verða á kynningu og markaðssetningu á SÍM og þeim listamönnum sem þar eru félagar. Ég er menntaður grafískur hönnuður og hef unnið í áratugi við markaðsmál og gerð auglýsingaherferða. Hef unnið á stærstu auglýsingastofum landsins auk þess að hafa stofnað eigin auglýsingastofu sem á stuttum tíma var farinn að vinna fyrir mörg af stærstu fyrirtækjum landsins. Hef líka rekið eigið fyrirtæki á þessu sviði í nokkur ár í Svíþjóð.

Ég var hönnunarstjóri hjá RÚV og Stöð 2 í mörg ár og þekki því fjölmiðla mjög vel. Þessi reynsla öll mun án efa nýtast vel í þessu starfi við að koma þeirri góðu og þörfu list sem félagar SÍM eru að skapa betur á framfæri. Ég er fylginn mér og læt hluti gerast. Er mjúkur og lipur í samskiptum en get líka verið harður í horn að taka ef því er að skipta.

Ég hef reynslu af félagsmálum í sambandi við myndlist og ég er ritari FÍM félags íslenskra myndlistamanna. Kjóstu mig kæri félagi ef þú vilt betri kynningu á því sem þú ert að gera í þinni myndlist.

Ég býð mig fram til formanns SÍM með skýra sýn: að styrkja félagið og gera það að raunverulegu afli fyrir myndlistarmenn. Ég legg áherslu á faglega stjórnsýslu, gagnsæi og skýra ábyrgð — þar byggist traust.

Sem formaður Myndhöggvarafélagsins í Reykjavík frá 2015 hef ég náð mælanlegum árangri: snúið rekstri í hagnað, þrefaldað veltu og tvöfaldað fjölda félagsmanna. Sú reynsla sýnir að árangur krefst skýrra ákvarðana og markvissrar stjórnunar.

Ég þekki kerfið og hef sinnt fjölbreyttum trúnaðarstörfum innan myndlistar. Markmið mitt er að færa SÍM úr viðbragðsfélagi í leiðandi afl með einfaldari rekstri, auknu gagnsæi og sterkari samningsstöðu fyrir myndlistarmenn.

SÍM á að vera fyrsti viðkomustaður myndlistarmanna, stjórnvalda og verkkaupa. Samkeppnisreglur félagsins eiga að vera gæðastimpill sem tryggir fagleg og sanngjörn vinnubrögð. Í dag er SÍM ekki alltaf sá vettvangur sem það getur verið. Það er tækifæri — og ég ætla að nýta það.

Ég vil byggja upp félag sem hefur raunveruleg áhrif. SÍM á að vera afl sem fólk finnur fyrir.