SÍM

Í ár eru liðin 50 ár frá því að hollensk-íslenski myndlistarmaðurinn Kees Visser heimsótti Ísland fyrst. Af því tilefni hefur hann fært sex íslenskum listasöfnum veglega gjöf, alls á fjórða tug listaverka.

Listasafn Íslands, Listasafn Reykjavíkur, Listasafn Háskóla Íslands, Listasafn ASÍ, Nýlistasafnið og Safnasafnið tóku við gjöfinni nú í vikunni.
Kees Visser er fæddur í Hollandi árið 1948 og á að baki langan og farsælan feril sem myndlistarmaður. Hann býr og starfar bæði í Haarlem í Hollandi og í Reykjavík og hefur um áratugaskeið átt sterk tengsl við íslenskt myndlistarlíf.

Í tengslum við sýninguna Í djúpi litanna: Ný verk eftir Kees Visser í Berg Contemporary árið 2018 skrifaði listfræðingurinn Jón Proppé meðal annars:
„Í Amsterdam kynntist Kees íslenskum listamönnum sem þá bjuggu í borginni og árið 1976 kom hann sjálfur fyrst til Íslands þar sem hann hefur síðan haft annan fótinn; hann deilir nú tíma sínum milli Reykjavíkur, Amsterdam og Parísar. Þegar hann flutti til Íslands gekk hann inn í samfélag ungra og framsækinna listamanna sem í síauknum mæli tóku mið af fluxus- og hugmyndalist. Hann var einn af stofnendum Nýlistasafnsins árið 1978 og hefur tekið þátt í fjölda sýninga þar. Í Reykjavík kynntist hann ekki bara fleiri íslenskum listamönnum heldur líka fjölmörgum leiðandi listamönnum frá Evrópu og Ameríku sem komu hér við til að taka þátt í þessu þróttmikla listalífi.
Eitt af einkennum listalífsins á Íslandi á þessum tíma var hve fjölbreytt verk listamenn sköpuðu og sýndu. Það átti líka við um Kees og hann sýndi jöfnum höndum verk á pappír, bókverk, höggmyndir og ljósmyndir, auk þess sem hann hélt áfram að nota texta í sumum verkanna. Um 1990 hafði hann þó snúið sér aftur að lita- og formsstúdíum sínum, og verkin urðu sífellt naumari eða minimalískari. Hann vakti t.d. athygli fyrir röð pappírsverka þar sem hann notaði einn lit og eitt form – trapisu, skekktan rétthyrning eða breiðar línur. Um miðjan tíunda áratuginn fór hann að þróa aðferðir til að gefa þessum verkum sterka áferð sem dýpkar áhrifin af litnum og teiknast upp af pappírnum eins og kristalsmyndanir. Þessari aðferð beitir hann enn í dag og hún er eitt sterkasta höfundareinkenni hans.“

Gjöfin er mikilvæg viðbót við safnkost íslenskra listasafna og styrkir enn frekar varðveislu og miðlun á verkum listamanns sem hefur um langt skeið verið virkur þátttakandi í íslensku myndlistarsamfélagi.

Að sögn Kees hefur Ísland gefið honum mikið í gegnum tíðina og með gjöfinni vill hann færa íslensku listalífi þakklætisvott. Hann nefnir sérstaklega hversu miklu máli það skipti í upphafi ferilsins þegar verk hans fengu jákvæðar undirtektir hér á landi.

Á myndinni eru frá vinstri:
Markús Þór Andrésson safnstjóri Listasafns Reykjavíkur, Elísabet Gunnarsdóttir safnstjóri Listasafns ASÍ, Kees Visser myndlistarmaður, Kristján Steingrímur Jónsson safnstjóri Listasafns Háskóla Íslands og Ingibjörg Jóhannsdóttir safnstjóri Listasafns Íslands.