SÍM

Steina fær sína fyrstu stóru yfirlitssýningu á Íslandi

Listasafn Íslands og Listasafn Reykjavíkur kynna með stolti fyrstu stóru yfirlitssýningu á Íslandi með verkum Steinu ( fædd Steinunn Briem Bjarnadóttir), sem er einn helsti frumkvöðull vídeólistar og nýmiðlunar í heiminum. Steina hefur um áratugaskeið verið brautryðjandi og áhrifamikil í þróun samtímalistar og hefur með verkum sínum tengt saman vídeólist, tónlist og tækni á einstakan og skapandi hátt.

Sýningin, sem ber heitið Tímaflakk/Playback, verður opnuð 4. október 2025 í báðum söfnum og stendur til 11. janúar 2026. Hún spannar allan listrænan feril Steinu, frá fyrstu verkum til nýrra, og gefur einstaka innsýn í þróun bæði listar og tækni undanfarna áratugi.

Playback var upphaflega skipulögð í Bandaríkjunum og sett upp á tveimur söfnum þar árið 2024. Sýningin á Íslandi verður þó enn viðameiri að umfangi og inntaki og fer fram í átta sýningarsölum – fjórum í Listasafni Íslands við Fríkirkjuveg og fjórum í Listasafni Reykjavíkur, Hafnarhúsi.

Steina hóf listferil sinn sem fiðluleikari í Reykjavík og Prag áður en hún flutti til New York árið 1965 með eiginmanni sínum, Woody Vasulka. Árið 1971 stofnuðu þau The Kitchen, goðsagnakenndan vettvang fyrir tilraunakennda tónlistar- og myndbandslist í New York. Frá þeim tíma hefur Steina sýnt víða um heim og verk hennar eru talin lykilverk í sögu vídeólistar.

Sýninguna skipuleggja Listasöfnin í samstarfi við MIT List Visual Arts Center og Buffalo AKG-listasafnið. Aðal sýningarstjórar eru Natalie Bell (MIT List Visual Arts Center) og Helga Christoffersen (Buffalo AKG), en hér á landi stýra verkefninu Markús Þór Andrésson og Pari Stave.

Sýningin verður einstakt tækifæri fyrir íslenskt listáhugafólk að sjá verk Steinu í heildstæðu samhengi – verk sem hafa mótað bæði söguna og framtíðina í samtímalist.