SÍM

Fyrsta samsýning myndlistarhóps Korpúlfa verður opnuð á Borgarbókasafninu Spönginni laugardaginn 28. janúar kl. 14:00. Korpúlfakórinn tekur lagið við opnunina.
Korpúlfar er heiti félags eldri borgara í Grafarvogi. Innan félagsins hefur myndlistarhópur verið starfandi í 10 ár, fyrst á Korpúlfsstöðum en nú í félagsmiðstöðinni Borgum í Spönginni, Grafarvogi.
Leiðbeinandi hópsins er Pétur Halldórsson listmálari. Hópurinn telur um 15 manns, sem hittast á þriðjudagsmorgnum og eiga saman góða stund.
Hver málar það sem honum er hugleikið og félagarnir finna myndefni hér og þar, ýmist í persónulegum myndum eða myndabönkum. Efniviður er að eigin vali, sumir mála á léreft, aðrir á pappír, en markmiðið er að skemmta sér og skapa saman.