SÍM

Listasafn Reykjanesbæjar opnar haust sýningar safnsins á Ljósanótt, fimmtudaginn 5. september kl. 18:00.

Verið velkomin á opnun tveggja sýninga: Huglendur – Bjarni Sigurbjörnsson og Ferðalangur – Kristinn Már Pálmason.

Huglendur - Bjarni Sigurbjörnsson

Með pentskúfi, en án fyrirhyggju, markar Bjarni fyrir striki eða stroku; sérhvert þessara ummerkja er vitnsburður um líkamlegt inngrip hans í veruleika myndflatarins, ekki tilraun til að draga upp „mynd“ af einhverju sem við teljum okkur þekkja í raunheimi. Í þeim gjörningi sem sérhvert verk er, renna líkamlegur veruleiki listamannsins – hreyfikraftur hans – og tjáning þessa sama krafts, saman við andlega kjölfestu hans og mynda heild sem er fullkomlega merkingarbær í sjálfri sér, þarfnast hvorki myndlíkinga né táknrænna útlistana til að lifa af það sem það sem sænski hönnuðurinn Sven Lundh kallaði „áreiti augans“.

Aðalsteinn Ingólfsson, sýningarstjóri.

Ferðalangur – Kristinn Már Pálmason

Sýningin er ferðalag um myndlistarferil Kristins Más Pálmasonar, en meirihluti verkanna er gjöf listamannsins til Listasafns Reykjanesbæjar.

Kristinn Már Pálmason, býður áhorfendum að fylgja sér í „Undraland“ vöntunar, þar sem órar liggja í leyni með því að halda fjarlægð frá ytri táknmynd. Myndverk Kristins hefja sig upp yfir þekktan efnisheim okkar, en skapa þess í stað lögmál sem tákngerir vandlega hugarheim listamannsins í sjónræna geómetríu, sem er um leið vegurinn að einhverskonar andlegri frelsun, þar sem vöntunin í myndefninu er sköpuð meðvitað.

Helga Þórsdóttir, sýningarstjóri.

Sýningarnar eru styrktar af Safnasjóði og Stapaprenti.

Huglendur og Ferðalangur standa til 5. janúar 2025.