NORR11: Hundurinn er til staðar - Þorvaldur Jónsson
![508A4884.JPG](https://static.wixstatic.com/media/b4dc0c_90594b2ba15f449cadaf57deffb4b80a~mv2.jpg/v1/fill/w_498,h_410,al_c,q_80,usm_0.66_1.00_0.01,enc_auto/508A4884_JPG.jpg)
fimmtudagur, 2. júní 2022
NORR11: Hundurinn er til staðar - Þorvaldur Jónsson
Þorvaldur Jónsson opnar sýninguna
Hundurinn er til staðar í NORR11
Rauður þráður sýningarinnar er hundur að skíta.
Verk Þorvaldar eru einskonar sögusvið þar sem ýmsar atburðarrásir eiga sér stað. Til að mynda má í þeim sjá nakið fólk í hringdans, bófa sem er búinn að týna þýfinu sínu og málara sem stigið hafa í málningu og spora allt út eftir sig. Rauði þráður sýningarinnar er þó hundar að skíta.
Titill sýningarinnar er vísun í verkið The Artist Is Present þar sem höfundurinn, Marina Abramović, sat gegnt gestum sýningarinnar og starði í augun á þeim. Þessi gjörningur hafði þau áhrif að margir gestir upplifðu einlægt augnablik með listakonunni, sumir brotnuðu jafnvel niður, grétu. Á sama hátt er eitthvað mjög einlægt við að horfa í augun á kúkandi hundi, hann algerlega berskjaldaður og óvarinn. Augnablik sem vert er að fanga.
Þorvaldur Jónsson (f. 1984) útskrifaðist frá myndlistardeild Listaháskóla Íslands árið 2009 og hefur síðan þá tekið þátt í fjölda sýninga, bæði hérlendis og utan landsteinanna, til dæmis í Þýskalandi, Kína og Tyrklandi. Verk hans hafa meðal annars verið sýnd í Listasafni Reykjavíkur, Gerðarsafni í Kópavogi, Hafnarborg, Listasafni Akureyrar og Safnasafninu á Svalbarðsströnd. Þorvaldur er einn af stofnendum Gallery Ports á Laugavegi.
Sýningin stendur til 9. ágúst, 2022.