SÍM

Sjáðu fegurð þína: Listamannaspjall í Borgarbókasafninu Gerðubergi, laugardaginn 25. nóvember kl. 14:00 – 15:00.

Kristín Ómarsdóttir og Guðlaug Mía Eyþórsdóttir, sýningarstjóri, ræða saman um verk hinnar fyrrnefndu á sýningunni Sjáðu fegurð þína sem var opnuð í Borgarbókasafninu Gerðubergi þann 26. október. Listamannaspjallið fer fram laugardaginn 25. nóvember frá kl. 14:00 – 15:00. Á sýningunni gefur að líta verk Kristínar frá ýmsum tímabilum. Sum hver hafa verið ofan í skúffu í áraraðir, en önnur eru nýleg.

Myndlistarsýningin var sett upp í tengslum við ritþing Kristínar Ómarsdóttur, sem haldið var í Tjarnarbíói í lok október. Þar var farið yfir rithöfundarferil Kristínar, en hún hefur ætíð sinnt myndlistinni samhliða ritstörfunum og stundum haldast þessi ferli þétt í hendur, eins og fram kom á ritþinginu.

Það verður forvitnilegt að heyra hvað Kristínu og Guðlaugu fer í milli og við hvetjum öll til að mæta og hlýða á!