SÍM

Verið hjartanlega velkomin á opnun sýningarinnar Blowout, laugardaginn 20. ágúst kl 17, með glænýjum verkum listamannanna Joakim Derlow og listamannatvíeykisins Ellinor Aurora Aasgaard og Zayne Armstrong

Á sýningunni sýnir Joakim Derlow ný verk sem öll eru unnin út frá hugmyndum um sögulegt samhengi rekaviðs og tengingar hans við þjóðsögu Grettis Ásmundssonar. Verkin eru kímið viðbragð við íslenskum sagnaheim og menningu þar sem hann skoðar þá brenglun og þann misskilning sem gjarnan á sér stað þegar erlendir gestir heyra staðbundnar sögur og staðreyndir.
Listamannateymið Ellinor Aurora Aasgaard og Zayne Armstrong sýna málverk og lágmyndir sem hafa skírskotanir til leiktjalda- og kvikmyndagerðar. Ummerki um neyslu einstaklingsins eru í forgrunni ásamt skírskotunum í afþreyingarmenningu sem gefa vísbendingu um hrörnun vestrænnar menningar. Snjallsíminn iCrack sem gerður er úr Wasa hrökkbrauði er auglýstur á sjónvarpsskjá, skuggamynd gerfilims fellur á pizzakassa og Elsa í Frozen hefur undirgengist viðhald listamannanna.
Sýningin stendur til 24. september, Kling & Bang er opið mið-sun frá 12-18.

Nánar á https://fb.me/e/2GCDZP0fC