SÍM

Vesturbæjarlaug var vígð 25. nóvember árið 1961 og við vígsluna var gosbrunnurinn Hafmey eftir Guðmund frá Miðdal gefinn til laugarinnar. Með tímanum lét verkið mikið á sjá og var að endingu tekið niður en það stóð upphaflega í steyptum brunni sem enn sést móta fyrir á lóðinni við laugina.

Listasafn Reykjavíkur lét steypa Hafmeyna í brons í samstarfi við Pétur Bjarnason myndhöggvara og hefur bronsskúlptúrinn nú verið reistur á stall við laugina á nýjum stað þar sem útbúið hefur verið setsvæði í kringum verkið.

Guðmundur frá Miðdal (1895-1963) bjó til fjórar gerðir hafmeyja til að nota í gosbrunna og voru nokkrar þeirra reistar í skrúðgörðum víða um land. Sumar stytturnar eru nú horfnar en ein er t.d í Reykjavík, í garði við Listavinahúsið Skólavörðustíg 43 og nú sem bronsafsteypa á stalli við Vesturbæjarlaug.

Á Sumardaginn fyrsta þann 20. apríl kl. 11.00 verður verkið formlega afhjúpað við Vesturbæjarlaug og því fagnað að það sé komið „heim“ aftur.