SÍM

Geirfugl eftir Ólöfu Nordal er aftur kominn á sinn stall eftir að hafa fallið niður við högg í mikilli ísingu í vetur.

Á bak við höggmyndina Geirfugl býr margþætt merking sem sýnir skoðun Ólafar á þjóðarvitund Íslendinga og þjóðararfleiðinni.
Verkið er staðsett í fjöru fyrir neðan Skeljatanga í Skerjafirði og er eftirlíking hins útdauða geirfugls. Verkið stendur á hnullungi úti fyrir fjörunni og vísar til Eldeyjar, þar sem síðustu tveir geirfuglarnir á Íslandi eru taldir hafa verið drepnir fyrir erlendan safnara sem bauð háar upphæðir árið 1844. Gerfuglinn er steyptur úr áli, þeim málmi sem Íslendingar hafa fórnað miklum náttúruauðlindum til þess að framleiða.

Geirfugl Ólafar var upphaflega settur upp sem hluti af afmælissamsýningunni Strandlengjan sem Myndhöggvarafélag Reykjavíkur stóð fyrir árið 1998.

Það var Guðbjartur Sævarsson sem sá um lagfæringu verksins í samstarfi við safnið og Ólöfu Nordal.