SÍM

Hlöðuloftið korpúlfsstöðum, Opnun laugardaginn 17. október kl 15:00
Listamannaspjall sunnudaginn 18. október kl 17:00

Brynhildur Þorgeirsdóttir opnar Heimildarsýningu á Korpúlfstöðum þann 17. október.
Þar gefst einstakt tækifæri til að skyggnast inn í heim Brynhildar og kynna sér störf myndhöggvara. Brynhildur mun vinna að nýjum verkum á meðan á sýningunni stendur og gestum býðst að koma og spjalla við hana á meðan hún vinnur.

Metnaðarfull dagskrá varpar ljósi á allar hliðar listsköpun myndhöggvarans allt frá hugmynd að veruleika. Það verður m.a. boðið upp á sögustundir, glerblástur og heimsókn á Vinnustofu Brynhildar.
Skúlptúrarnir á sýningunni spanna allan ferilinn frá 1983 – 2026

Brynhildur Þorgeirsdóttir (f. 1955) nam við Myndlista- og handíðaskóla Íslands 1974 -78 og stundaði síðan framhaldsnám við Gerrit Rietveld Academie í Amsterdam og við California Collage of Arts and Crafts auk sérnáms í gleri við Orrefors í Svíþjóð og Pilchuck Glass School Í Bandaríkjunum. Eftir sex ára búsetu Í New York á árunum 1984-90, hóf Brynhildur að reka eigin vinnustofu á Íslandi, en glerhlutina vinnur hún að mestu leiti á verkstæðum erlendis. Brynhildur kenndi reglulega glersteypu við Pilchuck Glass School.
Verk Brynhildar er að finna í öllum helstu söfnum landsins og í erlendum söfnum. Útilistaverk eru í m.a. í eigu; Reykjavíkurborgar, Garðabæjar, Akureyrar og Alingsås í Svíþjóð. Hún hefur hlotið ýmsa styrki og viðurkenningar fyrir verk sín, m.a. tvívegis hlotið styrk frá The Pollock-Krasner Foundation.

Þegar gengið er í átt að Bakkastöðum 113* má dást að hreystruðum veggjunum; möl úr fjörunni á Ragnheiðarstöðum í Flóa, allt heimaharpað (það tók eina herdeild nokkra daga að sigta þetta í rétta kornastærð). Brynhildur gat ekki hugsað sér að þekja veggina með norskri möl.
Þegar inn er komið blasir við fullkomin, innrömmuð sýn yfir voginn, gat í veggnum – algjör hugarró – Klettur frá árinu 1991 er rétt handan við hornið.

EKKI FARA ÚR SKÓNUM!

Heyrist kallað innan úr vinnustofunni. Ég geng á hljóðið og fundur hefst. Brynhildur hefur þegar lokið nokkrum dagsverkum á meðan mín helstu afrek eru að hafa ratað alla leiðina fram hjá Korpúlfsstöðum á þennan fund.
Brynhildur hefur tekið það upp hjá sjálfri sér að fara í gegnum allt sem á daga hennar hefur drifið í myndlistinni. (Svo að enginn annar þurfi að standa í þessu). Það liggur allt undir; myndir, sýningaskrár, módel og öll gögn. Allt er flokkað og skráð í þar til gerðar heimildarmöppur, svo fletta megi upp í því síðar. – Þetta verður bara gert einu sinni – Allir skúlptúrar eru skráðir í hús og þeir sem enn eru í móðurhúsum eru sendir upp á Korpúlfsstaði (gömlu vinnustofuna) ásamt möppum og módelum. Þannig næst einstök innsýn í störf myndhöggvarans. – Heimildarsýning. –

Hún hugsar með höndum og er meistari forms og áferða. Hún drottnar yfir jafnvægi milli hins stórgerða og hins ofursmáa, þess grófa og fágaða. Þetta landslag býr innra með henni án þess að hún þurfi að hafa mikið fyrir því. Jarlhetturnar úr æsku, hraunið sem þrýstist fram og kólnar við jökulrætur og smáverurnar sem skríða úr þeim volga polli. Hún er jákvæð fyrir hinu óþekkta, beitir því jafnan meðan hún andar niður í maga og pirrar sig ekki á því sem er óhjákvæmilegt. Hreinskilnin er leiðarstef og ekkert kjaftæði (engin vella blásin í gler)**; hérna eru skúlptúrar, ekki gera þér grillur um að þetta sé eitthvað annað!

Það er uppskerutími og það er ræktarlegt, eins og allt í kringum Brynhildi. En uppskeran þarf að gefa eitthvað í aðra hönd til að leiða listamanninn áfram veginn. Hún býður okkur að „Buy my art before I die“. Við erum hvött til að fjárfesta í framtíðinni með listaverkakaupum á afborgunum. Brynhildur hefur alltaf verið raunsæ varðandi hvað þurfi til þess að lifa sem listamaður. Engar afsakanir! Hún byggir sér bestu mögulegu vinnuaðstöðu sem höggmyndalistamaður getur hugsað sér. Með útsýni yfir voga og sker; fjöll í bakgrunni. Það getur ekki klikkað. Hún trúir því að til þess að fá það út úr lífinu sem mann langar þurfi maður að koma sér í þær aðstæður að maður taki stakkaskiptum, þroskist og breytist. Hennar stærsta höggmynd er þetta fagurlega tilhöggna og ríkulega líf sem hún hefur mótað sér í kjörlendi sínu við voginn.

Eftir að hafa tekið góðan snúning á slúðri frá vinnustofuárum Myndhöggvarafélagsins á Korpúlfsstöðum stend ég upp frá borðinu (sem líka verður ferjað á Korpúlfsstaði). Ég lít yfir vinnustofuna og velti fyrir mér hvað muni gerast þegar Brynhildur er búin að ganga frá öllum lausum endum. Ég geng út í haustið og horfi á sjálfsáð birkið í skúlptúrbeðinu – það verður eitthvað tryllt …

Hildigunnur Birgisdóttir

* Heimsókn í Paradís Brynhildar verður í boði á sýningartímabilinu, þið viljið ekki missa af því!
** Brot úr Gagnrýni Guðbergs Bergssonar einkasýningu Brynhildar sem birtist í Helgarpóstinum 1983.

Dagskrá sýningarinnar:
Opið miðvikudag til sunnudags kl. 14:00 – 18:00
Sögustund alla fimmtudaga kl. 16:00
Sunnudag 18.10. Kl.15:00. Listamannaspjall
Sunnudag 1.11. kl. 15:00. Glerblástur með Carissa Baktay
Laugardag 14.11. kl. 15:00.
Opin vinnustofa á Bakkastöðum 113, með Páli Hjaltasyni artitekt.
Sunnudagur 15.11. kl. 15:00. Lokun.
Opið fyrir hópa eftir samkomulagi í síma 895 9897
Þriðja auga sýningarinnar: Hildigunnur Birgisdóttir

Upplýsingar um listamanninn má finna á : www.brynhildur.com