SÍM

ART67/Opnun: Sighvatur Karlsson (1959) er gestalistamaður júlí mánaðar. Hann var lengi sóknarprestur í Húsavíkursókn. Nú er hann prestur í Hafnarfjarðarkirkju í hlutastarfi.

Sighvatur hefur um árabil stundað myndlist í frístundum. Viðfangsefnin hafa verið fjölbreytt enda margt sem heillar augað í íslenskri náttúru þar sem litapaletta skaparans blasir við augum.

Undanfarna fimm vetur hefur hann stundað nám við Myndlistaskóla Kópavogs í frjálsri málun og blandaðri tækni undir leiðsögn kennara, m.a. Sigtryggs Bjarna Baldvinssonar, Ingimars Waage og Söru Vilbergsdóttur. Í skólanum hefur hann verið að kynna sér samspil lita, tilfinninga og tónlistar.

Hann málar abstrakt myndir af ýmsum stærðum þar sem geometrískir litafletir þekja strigann. Hringformið heillar líka því að það býður upp á hreyfingu mýkt og fegurð sem fær áhorfandann til að líða vel í sál og sinni.

Formleg opnun verður laugardaginn 6 júlí kl. 14.00 til 16.00 Léttar veitingar.