SÍM

Sýningaropnun laugardaginn 4. apríl í Listval Gallerí, Hólmaslóð 6, 101 Reykjavík.

Fegurð íslenskrar náttúru – snævi þaktar fjallshlíðar, mosavaxið land og víðáttumiklar hraunbreiður – hefur lengi veitt listafólki og hönnuðum innblástur. Þessi kröftugu einkenni landslagsins mynda sameiginlegan snertiflöt í samstarfi Lilý Erlu Adamsdóttur og Thoru Finnsdóttur. Samvinna þeirra, sem er í sífelldri þróun, er nú sýnd í fyrsta sinn á HönnunarMars í Listval Gallerí.

Lilý Erla og Thora nálgast listina hvor með sínu móti, en í samvinnu þeirra myndast samtal þar sem hugmyndir, aðferðir og efnisnotkun fléttast saman. Lilý Erla vinnur með efnismiðaða og rýmislega nálgun þar sem textílverk hennar spretta úr persónulegum upplifunum og verða að huglægri túlkun á formum og fyrirbrigðum náttúrunnar. Thora nálgast viðfangsefnið á annan hátt. Í verkum sínum skoðar hún tengsl manns og náttúru og leitast við að miðla nærveru og sérstöðu íslensks landslags. Með skúlptúrum og steinþrykki vinnur hún úr hughrifum og leitar að sögum sem búa í efninu – þar sem náttúran stýrir samspili forms og útfærslu.

Sýningin varpar ljósi á hvernig þessar ólíku aðferðir hafa áhrif hvor á aðra og mynda lifandi samtal milli textíls og keramiks. Lífræn, bylgjótt form verkanna kalla fram hraunbreiður Íslands, en abstrakt eðli þeirra gefur til kynna tengingu sem nær út fyrir náttúruna sjálfa og að mannslíkamanum. Verkin hvetja áhorfendur til að íhuga eigið samband við landslagið og náttúruna sem mótar tilveru okkar.

Lilý Erla Adamsdóttir vinnur á mörkum myndlistar, hönnunar og listhandverks. Yfirborð er henni hugleikið, hvort sem um ræðir yfirborð náttúrunnar eða mennskunnar. Í verkum sínum skoðar hún handgerða endurtekningu, möguleika hennar og takmarkanir. Hvernig hið einstaka kallast á við fjöldann um leið og fjöldinn skapar einstakan samhljóm. Vinnuferli Lilýjar einkennist af stöðugu samtali við efnið, þar sem eitt leiðir af öðru. Undanfarið hefur hún nýtt sér eiginleika tufttækninnar til skoðunar á þræðinum og sjónrænna áhrifa hans, þegar kemur að samspili lita og efniseiginleika. Lilý talar ýmist um verkin sín sem loðin málverk eða dansandi útsaum. Lilý Erla Adamsdóttir (f. 1985) lauk BA gráðu í myndlist frá LHÍ 2011 og MA gráðu í listrænum textíl frá Textilhögskolan í Borås í Svíþjóð 2017.

Thora Finnsdóttir er listamaður og hönnuður búsett í Danmörku. Hún útskrifaðist frá Konunglegu dönsku akademíunni árið 2009 og starfar nú í Frederiksværk. Djúpt innblásin af hinum sterku andstæðum íslenska landslagsins spannar sköpun hennar margar aðferðir og miðla, þar sem mörkin milli listar og hönnunar verða óljós. Verkin sem eru á sýningunni endurspegla aðdáun hennar á síbreytilegri náttúru Íslands og fanga hráa fegurð hennar í keramikform.